تراتيل العشق ( ع الناصية المذكور أعلاها )

ع الناصيه المذكور أعلاها
ـــــــــــــــــــــــــــــــــ

بالليل ...

و انا راجع م القاعدا ايّاها

و ف نفس الحوَدايه الفاضيه

ع الناصيه المذكور أعلاها

من فضلك هدِّى السرعه

هِدِيت
من خلف ازاز السياره المتغطى ضباب
بصيت
للولد المِتْعَبِّى هموم

و البنت ام الشعر فيونكات

ع الأرض بترسم بالطباشير

قلبين

و غراب البِين

جاهز بالسهم يعدِّى

و لإنى كنت
وحيدًا فى ليلٍ شاتى

لم أسطع إنقاذ القلبين
من السهم الآتى

و لسانى لم يخدش بالنطق
زجاجَ سكاتى

و عبرتُ كمن عبروا خوفًا
هربًا بحياتى

و كثيرًا جدًا
أصحى م النوم مفزوع

على صوتى المقسوم نصِّين
و عنَيَّه المحتاجه لعين
و ضوافر إيد مالهاش آخر
بتعافر توصل للخشبه الطافيه
فوق موج قادر
على شط النيل يا ما أغانى حلوا
و ياما أحزان و نحيب
و اهى مره تصيب لكن ياما
مرات بتخيب
و ان كان دا الحال
ليه دايما عاقد منديلك ؟
و مجرجر فى نهارك ليلك ؟
خد كاس وانسى
أحلامكَ و هواجس ذاتِكْ
ما مرَّ من العمر اشطبْهُ
وامح التاريخ بممحاتِكْ
لا تشعلْ نارًا لستَ لها
كُفُؤًا و لتركعْ لغزاتِكْ
إنَّ القانونَ اليوم هنا
كله مطبات و سكك عُوجَه
و الفاشل بكره ف مدارسهم
هيكون لك يا مذاكر خُوجَه
مش عاجبك آه نص كلامى
ولا عاجبك شكلى وهندامى
ما تقفشى مبلّم قدامى
سيبك منى
و انظر للسحنه المحبوكه
و كلامهم بحروف ملويّه
و الجلباب مظبوط ع السوكه
و اللحيه البنى المكويّه
لمّا تفكر
قل لى انت ازاى بكره هنقدر
نقعد على شط النيل تانى
و نقزقز ترمس و سودانى
و الولد الغرقان فى همومه
و البنت الحلوه ام فيونكات
ع الناصيه المذكور أعلاها
هدِّى السرعه
راح ترسم بالطباشير قلبين
من غير السهم ما يجرحهم
ما يفرقهمش غراب البين

**********

محمود السيد إسماعيل