متصدقيش أبدًا فى يوم
حلمك لو انطمستْ رُؤاه
و ما تتبعيش من غير دليل
ضلك لو انحرفتْ خُطاهْ
متلونيش ما تشوِّهيش
خَدِّك بألوان الحُواهْ
و ماتسأليش عرَّاف ضرير
عن بُكرا واللى جاى وراهْ
و متزعليش فى سنين عجاف
على قلب باع حبك فتاهْ
يا ضىّ عين العاشقين
يا نور مِسبَّح فى الجباهْ
يا وحىْ أذِّن فى الوجود
يا مية العطشان صلاهْ
يا طيرك المبعوث نشيد
وشهيد على الصدق فى سماهْ
إنت الحقيقة ف حلمنا
و ف قلبنا حلم الحياهْ
***
محمود السيد إسماعيل
ـــــــــــــــــــــــــــ
ليست هناك تعليقات:
إرسال تعليق