ياااااا سيده

يااااا سيّده
مالي أراك ف بهو روحي مْمدّده
هوّا انتي إيه ؟
سلطانه فوق عرش القلوب
ولّا انتي لعنة أنبيا
فيه جنه مفتاحها الذنوب ؟
ولّا انتي نار بتحب لحم الأوليا
يااااااااسيّده
ليه اللي عايش بيكي ميت
واللي ماتت روحه حيّ
واللي بورصتهم عرقنا
واللي بالقانون سرقنا
توهبيه نور عين جنابك
واللي عن طيب نفس واهب روحه ضيّ
يبقى عايش فيكي أعمى
واللي عايش فيكي أعمى
فرصه لكلاب الشوارع فيكي
تاكل قلبه نيّ
يااااااااااااسيّده
الحب لما يكون عباده
لما فوق أرضك يعيش
تلتين عبيد والتلت ساده
الحب لما يكون ف شرع الأغبيا
أسوأها عاده
لمّا من صفحات حياتنا
تتشطب كلمة سعاده
لازم نهايتي المنطقيه تكون كده
ياااااااااااسيّده

حبك دنيتي وديني

بحبك
فكر وعباده
وف عيونك
عشقت حلاوة التسبيح
لمن علّم لساني القُول
ومين أوحى
لقلبي الشعر
ولْروحك بعتني رسول
بحبك
أمر بالإعلان
ورغم مشاعرك الرافضه
رسالتي
مكدّبه البرهان
ورغم المؤمنين بيا
من الدراويش
مَبملكشي لأحلامهم
صكوك غفران
بحبك
وانتي مش فاتحه
عيونك ليه ؟
وكل المعجزات عني
بتحلفلك 
بصدق نبوّتي
وعزمي
على حب اتفطرت عليه
بحبك
صبر ومصابره
على التكذيب
ولو حبك جنون شاعر
فيكفيني
ولو حبك سنين غربه
فحبك دنيتي وديني

ما لي وجنَّاتٍ كعرض سمائكمْ
بضلوعها للروح
ما هو أوسعُ

يا مانِحِي بُشرى قبولي
أفتني
ألجنةٍ مثواي أم لضلوعها ؟

مُتوضئًا برؤاكِ
قمتُ مُصليًا
في قلبكِ المعمور بالغفران

درويش

أنا كنت ماشي ف سكتك
درويش
وف حضرتك حاشد
جميع ناسي
مش ناسي منهم
أغنيا وحرافيش
غنيت قصايدي
ف زحمة الحاضرين
حاضرين وروحهم
كالإزاز هَشه
متجمدين م البرد
والد... هشه
ياااا سيده ردي لنا روحنا
فكي طلاسم هذه المِحنه
اتنزِّلي فينا أمل و عفاف
دفِّي قلوبنا بنورك الشفاف
ياااا سيده
حذرتك التطنيش
وكتير ناديتك
وانت مترديش
لو تهنا في سكتك
عن حضرتك رُحنا
فبحذرك من غضبة الدروايش

كل ده وبتكدبيني

كل حرف بشوق ولهفه
بيناديني
كل نظره من عيونك
نورت ضلمة سنيني
كل رعشة من إيديكي
وهي تايهه ف بحر إيدي
نبضة بتشعلل حنيني
وكل لحظة حب مرت
واحنا
مش دارين بروحنا
روحنا فيها لدنيا تانيه
وكل ثانيه وكل ساعة
وكل كم يوم افترقنا
كل ده وأكتر بحبك
صدقيني 

أحبك مرتين

أحبك مرتين
على الفطور
وأبكي ساعتين على الغداءْ

وأرغب فيك
حين يغيب عقلي
وأرغب عنك إن حضر العشاءْ

وأكتب عنك
شعرًا في سطور
وأقرأ فيك قول أبي العلاءْ

أهذا ما جناه أبي عليَّا؟
لعمري إنه شر ابتلاءْ

فمثلكِ
لم تلد في الأرض أنثى
ومثلي
لن تُرَوِّضَهُ النساءْ