تراتيل العشق { بقلب جرىء }

بقلب جرىء 

غابه وأسدها عجوز

محنى على همّه

واللى يخاف م الموت 

مايفتش حضت امّه

والواد بقلب جرىء

فارد جناح ع الوطن

لا الخوف بيمنع قدر

ولا مستحيل همّه

******

محمود السيد اسماعيل

تراتيل العشق { نجمتين وقمر }

نجمتين وقمر

نجمتين وقمر
هما اللى فى سمايا
كتير بنسى الغُنا
تسرقنى دنيايا
وتزيد بقلبى الجراح
والتوهه جوَّايا
آخد فى حضنى القمر
تحضنى ضحكتهم
ألقى الكلام فراشات
تتقرب المسافات
تتحقق الآيه

*****

محمود السيد اسماعيل

تراتيل العشق { ويفيد بإيه السكات }

ويفيد بإيه السكات

ويفيد بإيه السكات
و سكاتنا إيه ورَّانا ؟
غير بومه جارحه
وسارحه
معششه جوّانا
نسكت ونبلع جراحنا
لحد إمتى ومين
هيحس بينا
ويرحم دمعنا وبكانا ؟

********

محمود السيد اسماعيل

تراتيل العشق { كلام الغزل }

كلام الغزل

ان كان فى قلبك
كلمتين متكتفين
قولى
لو كنتى جايه وحابه
تسمعى قولى ؟
ان كان كلام الـ غزل دفّى
قلوب مجا ريح
فانا شعرى بايدى انــ غزل
دفَّانى مهما اجا ريح

*****

محمود السيد اسماعيل

تراتيل العشق { منابع الأحلام }

منابع الأحلام

انا راجع اكتب لك
يا بلدى كلام
مغزول بنول الشقى
مرفوع كما الأعلام
وان سد سلطان السكات
بوحى
طب كيف يسد
منابع الأحلام

******

محمود السيد اسماعيل

تراتيل العشق { من صغرى }

من صغرى

من طينها لحمى

ودمى فى عروقها

وان جفّ نيلها

أسيل على شقوقها

باسط لها شوقى

شارب كاسات شوقها

حارسها من تحتها

وفارد جناح الحمى 

من صغرى فوق فوقها

******

محمود السيد اسماعيل

تراتيل العشق { كش ملك }

كش ملك 
.............

لو تعرفي
أنا مستحيل اكدب واخون أو اغشّ
وازاي اخون وانا طِبتي م الأول
متسطره زي الكتاب في الوشّ
أنا أصلي برجع كل يوم 
م الشعر شِبه قتيل
وما فيش خروج بعد العَشا غير لمَّا انام
مع شلة الأصحاب وكالعاده
بعد المحاضرات السخيفه
ورغي فى ودان البنات
والشاب روميو والعيون النعسنات العاشقات الواهمات
متجمعين أصحاب
والشاي ما هوش بحليب
والنسكافيه ساده
وعشانا جمعيه 
والفقر بزياده
متجمعين على لوحة الشطرنج فوق سطح السكن
وانا جوّا سياره من الدفع الرباعى
فوق مطبات السكات
بحجل على بلكونه سورها من الورق
شِبَّاكها من برّا حديد
والشيش من الخشب اللى م العفن اتفلق
وإزاز مِشرّخ 
قلبي اللى شايله جوّا محفظتى
بعنايه ومتبت عليه فجأه اتسرق
والضباب اللى ملبّد من زمن ..........

مِن سيل أدمع نسوةٍ
كَمْ فوقه قد جُمِّدتْ وتحجَّرتْ من نشــــوةٍ
و عليه كم كُسرتْ ولم تُجبَرْ ملامح بسمةٍ
و كم انتشى السجَّانُ من جرح السجيــــنِ
و كم بكتْ و تألمتْ لنحيبهِ من صخــــرةٍ
و أعود مهزوماً  على ........

تهليل عزيز ابن اللئيمه
والمَلك محصور ما بين خبث الوزير وحصان ورُخّ
ولقيتي بَغرق للركب
والكل مستغرب لإني مش بعاده اتغلب
وعزيز ...  بيضحك
والعرق ... لما خدتني بين إديها 
وبوسه جامده بالقوي قدام مرايتها
اللي ياااااااما حسدتهاعمَّاااال يُرُخّ
صدقيني بحبك انتي
أنا عمري ما اتعودت الخبط أو أشخبط
ولا حتى أتشعبط على البلوزات
طول عمرى دايس فى السَليم
وسْلِيم بموَّاله الوحيد ايَّاه
غنيوه بلدى وسرها ويَّااااااه
والطعم حرَّاااااق بس يستاهل
فقوليلي ممكن احب غيرك مين 
وانتي اللي قاتلانى ؟!
هوّ اللي مات مَرَّهْ ويرجع للحياه
ممكن يموت تاني ؟!
طب تعرفي وانا ماشي ويَّاكي وإديا فى إديكي
وولادنا حوالينا وضلوعي ضمَّاكي
وعنيّا فى عــ .....نيها
اللي ياما دوختني ساعات
كنت اما اذاكر
أشوف رموشها مِدبّحه الكلمات
كل البطولات اللي فى كتاب التاريخ 
ما بَقِتْش
القاده والحراس هربوا مع الأوباش
حتى الملك واجهته بعيونها طَبّ بلاش
شاورت جميعهم جري
قالت .... منستغناش
برفانها كِيفْ انساه !!!
وهوَّ دايما .............

حاضــــــرٌ ومُعطِّــــرٌ أنفاسـي
تتراقص النغمات فى همساتهـا
فتحيلني نهرًا مِن الإحســـــاسِ
و أعود منطويًا على أنفاســــها
كمحارةٍ قبضتْ على ألمـــــاسِ
و لأنني ........

من يوم مَاسَافْرتْ يا حبيبتي
وانا هنا ومابين إديكي
بحبك انتي
وحتى لما بتصرخي ف وشّي
برجع واقول طيب ومعلهشي
وحتى لما بَتْفِزِعْ م النوم
والاقيكي جوّا دماغي بتوشّي
وحتى لما بفتكر 
أول ما شفت عنيها فى النادي اللي طبعًا
كنت ضيف مش عضو فيه
وخدتْني فوووووق .... فوق السحاب
وقالتلي أول كلمه بعنيها .....

أنا لن أقولَ كما تقول العاشقاتُ
أحِبَّنِى واحفظ طهارة مَعبدي
لكنَّني سأقولها وبدون أي تردُّد ِ 
أقبلْ وشُدّ على فميقبِّلْ وذوِّبْ فِىَّ كلَّ مُجمَّدِ
وازحف على مُدنى بخيلك غازيًا
واركض بشوقكَ صَوْبَ نهرٍ خالدِ
وانس الصحاب ........

وخُد إديَّا
ويااااااااااااااه على إديها وصوابع
طعم لمستها حيااااااه
كتبتْ على خَدِّ القمر إسمي اللي لسه معاها مارجعشي
قلبي الحزين حاول يِمِدّ إديه ويشدها جوَّاااااااااه
وعشان نجوم السما كانت اقرب لي
كم نِجمه من كم سما 
وف عقد غالي جميل
جريت عليها ولهفتي سابقه
والفرحه طارحه فى العيون مواويل .......

لكنها نظـــرتْ إليَّ بنظرةٍ
حَيْرى وتملـــؤها الدمـــوعُ
فرجعـــتُ متكئـــــــًا على
جرحي يُدثِّرني الصقيــــعُ
و مثلتُ مُتهَمًا بجرم نبوءةٍ
كَذِبٍ و أحلامــي تضيــــعُ
وطفقتُ ..........

من يومها مهاااجر من بلاد لبلاد
شايل ف قلبي جراح متلفَّعه بعناد
لا الموت عليها قِدر
ولا خفّ عنها وعااااااد
وابن اللئيمه الواد ..... عزيز صاحبي
حيموت ويغلبني فى دور شطرنج
ولأن شباكها قصادي قلبي فطّ إليه 
فتَحِتْ دخلْ
حَضَنِتْ قفلْ
الوقت عَدّى وفاااااااات
والرُّخّ مِتربّص ورا حصانه
ووزيره شادد ع اللجام بإديه
وفجأه صوت ارتطم
بوداني صحَّاني 
أنا قلت إيه يا عزيز .. رجع الزمان تاني ؟!
قال : كشّ ........ ملكك مات